မိုးရွာမယ်လို့ ထင်တော့ အထင်သား။ မနက်ကတည်းက ကောင်းကင်က မကြည်လင်ဘူး။ သို့ပေသိ စိမ့် ထီးမယူလာခဲ့မိဘူး။ မိုးအုံ့ပေမယ့် ရွာမယ်မရွာမယ် သေချာ မသိနိုင်တဲ့အရပ်ပေဘဲ။ ရွာပြန်တော့လည်း ဖွဲသလို စဲမလိုနဲ့ ဒီအရပ်ရွာတဲ့မိုး သူ့ကို တခါမှ မစိုခဲ့ဘူး။ သူတို့ ငယ်ဘဝ ကောင်းကင်ကတော့ ဒီလို မဟုတ်လေဘူး။ မိုးအုံ့တယ်ဆိုကတည်းက ရွာကိုရွာမှာ။ မိုးရေကြောင့် စွတ်စိုအေးမြ စိုရွဲမှာ သေချာတဲ့ ကောင်းကင်ပါ။
သဲတဲ့မိုးကြောင့် ညက ပို တိတ်ဆိတ်မှောင်မိုက် နေသလိုဘဲ။ မိုးပေါက်ကျသံနဲ့ ရထားသံ ရောထွေးကြားရတော့ ရင်တခုလုံး လေးလံထိုင်းမှိုင်းကာ ဆွတ်ကျင်စိတ် ၀င်လာတယ်။ အဲဒီအသံကို ကြားတိုင်း စိမ့် အမြဲလို နှုတ်ခမ်းကိုက်မိတယ်။ စိမ့် ဆင်းတဲ့ဘူတာ ရောက်တော့ မိုးဖွဲစပြုပြီ။ လေကတော့ တချက်တချက် ပြင်းပြင်းထန်ထန် တိုက်နေတုန်းဘဲ။ ဘူတာကနေ သူ နေရာအရပ်ဆီ အပြန်လမ်းမှာ စက်ဝိုင်းခြမ်းပုံ လမ်းကွေ့လေးနဲ့ တောင်ကုန်းလေးတခု မော့မော့ကလေး တက်ရတယ်။ ညနေတိုင်း တောင်ကုန်းလေးကို အတွေးများ သီချင်းများ ဈေးဝယ်အိတ်လေးများ စာရွက်စာတမ်းများကို အဖော်သဟဲပြုကာ သွက်သွက်လေး လျှောက်တတ်စမြဲ။
စည်ကား ရှုပ်ထွေးတဲ့ လမ်းမကြီးကနေ တောင်ကုန်းလေးဆီ ချိူးအကွေ့ လမ်းသွယ်တခုလုံး လူသူ ကင်းမဲ့နေတယ်။ မိုးကြောင့် အပြေးလေး သော့ လာတဲ့ စိမ့် လမ်းချိုးမှာ မင်သက်မိစွာ ရုတ်တရက် ရပ်တန့်သွားတယ်။ တောက်ပ လင်းထိန်တဲ့ လမ်းမီးရောင်အောက်မှာ မိုးဖွဲလေးတွေ အစောင်းလိုက် ခုန်ဆင်းနေတာ မြူတွေလိုလို တိမ်ခိုးလိုလို ရုပ်ရှင်ပိတ်ကားတခုကို ကြည့်နေရသလိုလို။ အားကောင်းတဲ့ အလင်းတန်းအောက် မိုးပေါက် တပေါက်ချင်း ထင်ထင်ရှားရှား မြင်ရပြီး လေအရှိန်ကြောင့် မြေပြင်ပေါ် ချက်ချင်း မရောက်သွားဘဲ အနှေးပြကွက်နဲ့ ကခုန်နေကြသလို ထင်မြင်ခံစားရတယ်။
မိုးရေစက်များ လေတိုးသံများ အလင်းတန်းများ မိုးနှင်းမြူများ သူ့ စိတ်အာရုံထဲ စိတ်နှလုံးထဲ တပြိုင်နက်ဝင်ရောက်ကာ အရောင်တွေ အသံတွေ ရောထွေးပြီး တခုတည်း ဖြစ်သွားတယ်။ စဉ်းငယ်မျှ အသက်ရှု ရပ်သွားတယ်။ မိုးနှင်းမြူပြကွက်ထဲ သူ စီးမျောသွားတယ်။ ပတ်ဝန်းကျင်က အသံတွေ မြင်ကွင်းတွေ အားလုံး ပျောက်ဆုံး တိတ်ဆိတ်သွားတယ်။
ထိုစဉ်အခိုက် လမ်းကွေ့လေး နံဘေး အလှစိုက်ထားတဲ့ အခက်အလက်ဖြာတဲ့ တောင်ထန်းပင်အုပ် နံဘေး လူတယောက် ရပ်နေတာ မသဲမကွဲ မြင်လိုက်တယ်။ သစ်ရွက်များကြောင့် ရှင်းရှင်း မမြင်ရဘူး။ တဝက်တပျက်သာ မြင်လိုက်ရတဲ့ တခြမ်းစောင်းပုံရိပ်ကြောင့် စိမ့် မျက်လုံးတွေ ပြာသွားတယ်။
ဘုရား ဘုရား။ ညည လား။ ဥာဏလား။ အိုး…….. အသိစိတ် ဝင်စမ်းပါ။ ဘယ်လိုဖြစ်နိုင်မလဲ။
ရုတ်ချည်း သတိဝင်လာပြီး စူးစမ်းစိတ်နဲ့ ကွေ့ကောက်တဲ့လမ်းကလေး အတိုင်း တောင်ထန်းပင်အုပ်ဆီ စိမ့် သွက်သွက် လျှောက်တယ်။ သစ်ပင်အုပ်နံဘေး ဘယ်သူမှ မရှိဘူး။ ဘေးဘီဝဲယာ လှည့်ပတ်ကြည့်ရှုတယ်။ ခုနက သူ မြင်လိုက်တာ တကယ်ကော ဟုတ်ရဲ့လား။ သူ မတ်တပ်အိပ်မက် မက်နေသလား။ လက်တွေ့လောကမှာကော ရှိသေးရဲ့လား။ အရောင်တွေအရိပ်တွေ ရောထွေးသွားလို့ အာရုံထင်မှား မြင်နေတာလား။
စိမ့် သူ ဆက်သွားရမဲ့ တောင်ကုန်းဆီကို လှမ်းမျှော်ကြည့်မိတယ်။ မြင်ကွင်းတခုလုံး တိတ်ဆိတ် ငြိမ်သက်လျက် ရှိမြဲ။ လောကကြီးတခုလုံး စိမ့် တယောက်တည်းသာ ရှိတယ်။ လေတိုက်လာပြီး မိုးနှင်းမြူတွေ သူ့ကို ဖွဲပက်လိုက်တယ်။ ခါတိုင်းလိုဘဲ ဒီမိုးရေစက်များ သူ့ကို မစွတ်စို မအေးမြစေဘူး။ သွေးကြောများ စပ်ဖျင်းဖျင်း ပူနွေးလာပြီး တကိုယ်လုံး တုန်လာတယ်။ စိတ်ထဲ ဆို့နင့်လာတယ်။ မျက်လုံးဆီကို ဘယ်က အရည်ကြည်တွေ ပို့လွတ်လိုက်သလဲ။ ငိုချင်လာတာလား။ မဟုတ်တာ။
ဥာဏ အတွက် သူ ဘယ်နှစ်ကြိမ် ငို ခဲ့ဖူးသလဲ။
တခါမှ ………….
သူ တခါလေးမှ မငိုကြွေးခဲ့ဖူးဘူး။
******
စိမ့် ကြောင့်သာ ဥာဏ တယောက် ငယ်ကတည်း ခဏခဏ ငိုခဲ့ရသူပါ။ ခင်ခင် လို့ စိမ့် ခေါ်တဲ့ ဥာဏရဲ့ မေမေ ဆီက နို့လုစို့တယ်။ သားအရင်းကို တွန်းဖယ်တယ်။ သူ့အမေ ရင်ခွင်ထဲ တိုးဝင်လာတဲ့ ကောင်လေးကို ခြေထောက်နဲ့ ကန်တယ်။ ကစားစရာ အတူတူ ဝယ်ပေးထားတောင် သူ့ပစ္စည်း အရင်ပျက်စီးသွားတတ်ကာ ရိုရိုသေသေ ကိုင်တွယ်တဲ့ ဥာဏ ရဲ့ ကစားစရာကို လု ယူတယ်။ ဖွက်ထားတဲ့ မုန့်ကို ရအောင် ရှာစားတယ်။ စိမ့်ရဲ့ သံပတ်ကားကို ခဏယူဆော့တဲ့ ကောင်ကလေးကို လက်သည်းနဲ့ ကုတ်ခြစ်တယ်။ သွားနဲ့ကိုက်တယ်။ ခေါင်းနဲ့တိုက်တယ်။ ဥာဏ လက်မောင်းကို သူ ကိုက်ပစ်တာ ယောင်လာပြီး ၃ ရက် ဖျားတာ မှတ်မိတယ်။ သူကိုယ်တိုင် မှတ်မိတာလည်းရှိ အမေတွေပြန်ပြောတာလည်းရှိ ငယ်ဘဝအချိန်များမှာ သူ့ကြောင့်သာ ဥာဏ ငိုခဲ့ရတာ။ ခဏခဏ မျက်ရည်ကျပြတတ်တဲ့ မောင်ဥာဏကြောင့် စိမ့် အဆူခံ ခဲ့ရတာလည်း မနည်းပါဘူး။
အတူကြီးပြင်းလာပေမဲ့ ဥာဏဟာ သူ့ရဲ့ တွဲဖော်တွဲဖက်ကောင်း မဟုတ်ဘူး။ ချောင်းထဲ ရေသွားကူးရင် ဥာဏ ရေနက်ထဲဆင်းရမှာ အလွန်ကြောက်တယ်။ ခင်ခင်က ရေကူးသွားတာ မကြိုက်လို့ သားလိမ္မာလေး လုပ်နေတာ များပါတယ်။ ဘောလုံးကန်ရင်လည်း ဂိုးဖမ်းတာဘဲ လုပ်ချင်တယ်။ ရန်ဖြစ်ရင်လည်း လက်သီကောင်းကောင်း မထိုးတတ်။ အပင်တက်ခိုင်းရင်လည်း တွန့်ဆုတ်ဆုတ်။ စိမ့်က မိန်းကလေးတန်မဲ့ အပေါင်းအသင်း မျိုးစုံနဲ့ လက်တည့်စမ်း ပွေလီရှုပ်ထွေးနေချိန် ဥာဏ က ခင်ခင့် အနားကပ်ကာ ဆံပင်သပ် ကျောသပ် ခံနေတယ်။
စိမ့် က နိုးကြားတက်ကြွသူ။ ဥာဏ က ငြိမ်သက်တိတ်ဆိတ်သူ။ စိမ့် က ပြောချင်တာ ချက်ချင်း ပြောချတတ်သူဖြစ်ပြီး ဥာဏကတော့ သူ ပြောလိုရာစကားမှ ရှိပါလေစွ အထင်ခံရသူ။
ငယ်ငယ်က သူ့အမတွေ နားဖောက်ကြတော့ သူလည်း ဖောက်ချင်တယ် ငိုယိုပူဆာလို့ ခင်ခင်က သူ့ကို နားပေါက်ဖောက်ထားပေးတယ်။ စိမ့် မယ် မိန်းကလေးဖြစ်ရက် နားပေါက် မရှိဘူး။ သိတတ်လာတော့ သူ့နားပေါက်ကို စိမ့်က လက်ညိုးနဲ့ တို့ တို့ ကစားပြီး လှောင်ပြောင်တဲ့အခါ ဥာဏ ရှက်တယ်။ စိမ့် အလိုအရဆို အစကတည်းက ဖောက် မပေးဘူး။ ခင်ခင်က သူ့သမီးအကြီးမတွေလို ဥာဏကို မွေးမြူတာ အတော်ဆိုးတယ်။
စိမ့် လုပ်ဖူးချင်တဲ့အလုပ်တွေ အရမ်းများတယ်။ ဘယ်အရာမဆို စူးစမ်းလိုက်ချင်စိတ်လည်းရှိတယ်။ စိမ့်ရဲ့ ကောင်းကင်ကိုလည်း ကျယ်ပြန့်သည်ထက် ကျယ်ပြန့်လိုတယ်။ စိမ့် မိဘများကလည်း သူတပါးကို မထိခိုက်သရွေ့ စိမ့် လုပ်ချင်တာ လုပ်နေတာ မကွပ်ညှပ်ဘူး။
ဥာဏလည်း ကျန်းမာသန်စွမ်းတဲ့ လူငယ်လူရွယ်တဦးဘဲ။ လူငယ်ပီပီ စူးစမ်းစိတ် ရှိမှာပါဘဲ။ ခက်တာ သူက ခင်ခင့်စကားကို နားထောင်လွန်းတယ်။ သိမ်မွေ့ ယဉ်ကျေးလွန်းတယ်။
‘ညည။ ယောင်္ကျားလေး က ယောင်္ကျားပီပီ နေစမ်းပါ ဟ။ ခင်ခင် ဆူတာများ ဘာကြောက်စရာရှိလဲ။ လူကြီးတွေ ဆူမှာကြောက်လို့ ဘာမှမလုပ်ပဲ နေရရင် ငါတို့ လူငယ်ဘဝ အလဟဿ ဖြစ်သွားမှာပေါ့။ ငါ့ ဆို အကုန်သိချင် စမ်းချင်တယ်။ တချို့ ကိစ္စတွေဆို ငါနဲ့ မအပ်စပ်လွန်းလို့သာ လက်လျှော့ထားရတာ။ နင်ပါရင် ငါက သွားစမ်းမလို့။ ’
‘ ငါ နေတတ်သလို နေတာ။ အမေကို ကြောက်လို့မဟုတ်ဘူး။’
‘ ဒါပေမယ့် နင် ခင်ခင် ဆူမှာကို အတော် လန့်တာ မဟုတ်လား။’
‘ ငါ ကြောက်တာ မဟုတ်ဘူး။ တတွတ်တွတ် ပြောနေရင် ငါလည်း စိတ်ရှုပ် အမေလည်း ခေါင်းကိုက်နဲ့။ အမေ စိတ်ညစ်ရမဲ့အလုပ် မလုပ်ချင်ဘူး။ ပြီးတော့ နင် လုပ်နေတာတွေ ဘာ အရေးကြီးတာ ရှိလို့လဲ။ ငါ ကြည့်နေတာ….. နင် ပေါင်းနေတာ လူရှုပ်တွေချည်းဘဲ’
‘ အေး ဟေ့။ လူရှုပ်တွေနဲ့ ပေါင်းမှ ရှုပ်တာ ဘာလဲဆိုတာ သိမယ်လေ။ ငါကလဲ ရှုပ်တာကို ကြိုက်တာ။ ရှုပ်ဖူးမှ ရှင်းနိုင်မယ် ဟ ဟ။’
စိမ့် အပေါင်းအသင်းများတာ ဥာဏ မကြိုက်ဘူး။ ပျင်းစရာကောင်းလောက်အောင် ပိပြားလှတဲ့ သူ့အမတွေနဲ့ နှိုင်းပြီး လာ လာ ဆုံးမတာကိုလည်း စိမ့်က မနှစ်သက်ဘူး။ စိမ့် လုပ်ချင်တာတွေ အကန့်အသတ် ခံရတဲ့အခါ နင်နဲ့ငါ နေရာချင်းသာလဲချင်တယ် ညညရာ လို့ မကျေနိုင်မချမ်းနိုင် အထပ်ထပ် ပြောတယ်။ ချုပ်ရရင် ဥာဏ နဲ့ စိမ့် ငယ်ဘဝ ကုန်ဆုံးချိန် မတူကြတဲ့သူတွေ။
ဒါပေမဲ့ ဥာဏ စိမ့် အတွက် အသုံးဝင်တဲ့အချိန် ရှိပါသေးတယ်။ ကျောင်းကအပြန်ဆို စိမ့် စက်ဘီးကို ဖုန်သုတ်ပေးတယ်။ ရံဖန်ရံခါ ရေဆေးပေးသေးတယ်။ မြေပုံမဆွဲတတ်တဲ့ သူ့အတွက် ပထဝီအိမ်စာ မြေပုံတွေ ကို ကောင်းကောင်း ဆွဲပေးတယ်။ စိမ့် လိုချင်တဲ့ သီချင်းတွေ သွားကူးပေးတယ်။ သီချင်းစာအုပ်မရှိရင် သီချင်း အခါခါ နားထောင်ပြီး ဗလာစာအုပ်ထဲ စာသားတွေ ကူး ရေးပေးတယ်။ ရံဖန်ရံခါ စိမ့်က ပူဆာရင် သူ့ ဂစ်တာလေးနဲ့ သီချင်း တိုးတိုးလေး ဆိုပြတယ်။ ရှားရှားပါးပါး အချိန်တွေပါ။ သီချင်းကြိုက်တာ တူတာ တချက်ရှိလို့သာ ဥာဏ လူငယ်လူရွယ်ပါလို့ အသိအမှတ်ပြုရတယ်။ ဒီလိုအရွယ်မှ ဂစ်တာလေး မခေါက်ရင် ဘုရားစူး လူငယ်လို့ ပြောရတော့မယ်။
ဥာဏကို မျက်မုန်းကျိုးရတဲ့ နောက်တချက်က ကျောင်းဆင်းရင် အိမ်တန်းပြန်သွားတာကာ အမေတွေ အမ တွေကို ကူ သတဲ့။ စိမ့် မေမေက တခါတလေ စိမ့်ကို ဥာဏနဲ့ လာ လာ ယှဉ် ပြောရင် သိပ် စိတ်ဆိုးတယ်။ စိမ့်က သူ့လွယ်အိတ်ကို ဥာဏနဲ့ ထည့်ပေးလိုက်ပြီး စက်ဘီးတစီးနဲ့ နေဝင်မိုးချုပ် လည်ပတ်တယ်။ ငါကို မြေပုံဆွဲထားပေးလို့ အမိန့်ပေးလိုက်သေးတယ်။ ကိုယ်က နိုင်စားလို့ ရပေမဲ့ တခါတလေတော့ ဒီလောက် အေးဆေးသည်းခံတာကို နှလုံး မတွေ့လှ။ ခင်ခင်တို့များ သား ယောင်္ကျားလေးကို ဘယ်လို အုပ်ထိန်းပါလိမ့်လို့ မျက်ခုံးတွန့်မိတယ်။
စိမ့် မျက်ခုံးတွန့်တာကိုလည်း ဥာဏ မကြိုက်ဘူး။ မျက်ခုံးတွန့်ကို လက်နဲ့ လာ လာ ဖြေကာ ငယ်ငယ်လေးနဲ့ အရေးကြောင်း ထင်တော့မယ် ပူပင်တယ်။ စိမ့် မိုးရေထဲ အနေကြာပြီး အအေးမိကာ နှာရည်ယိုတိုင်း ကြုံရာနဲ့ ကောက် သုတ်တဲ့ အကျင့်ရှိတာကိုလည်း မကြိုက်ဘူး။ မိန်းကလေးဖြစ်ပြီး လက်ကိုင်ပုဝါ ဘာလို့ မဆောင်သလဲ ဆူပူပြီး သူ့လက်ကိုင်ပုဝါ အမြဲ ထုတ်ပေးတယ်။ စိတ်ပျက်ဘွယ်။ ကောင်လေးဖြစ်ပြီး လက်ကိုင်ပုဝါနဲ့။ စိမ့် နှပ်ညှစ်ရင်းနဲ့ ဥာဏ့ လက်ကိုင်ပုဝါတွေလည်း ဇာတ်သိမ်းရတာ များတယ်။
အထက်တန်းရောက်ချိန် စိမ့်က မြို့လေးကိုကျော်ကာ ပြင်ပကမ္ဘာကို လှမ်းထွက်ဘို့ အစီအစဉ် ချနေပြီ။ ကျယ်ပြောတဲ့ လောကအသစ်ဆီကို ပျံသန်းဘို့ စိတ်ကူးယဉ်နေပြီ။ သူ့ လိုဘဲ ဥာဏကိုလည်း ရည်မှန်းချက် ကြီးကြီးထားကာ အိပ်မက်အကြီးကြီး မက်စေချင်တယ်။ စကားကြီးစကားကျယ်တွေ အတောမသတ် ပြောတတ်လာတယ်။
‘ညည စာကျက်အုန်း။ နင် အမှတ်မကောင်းရင် ရန်ကုန်ကျောင်း မဝင်နိုင်ဘူးနော်။ နင် ခုတလော ခြေလှမ်းပျက်နေတယ်။ ငါ ခင်ခင်နဲ့တိုင်မယ်။’
‘ငါ ဘာလုပ်နေလို့လဲ’
‘မောင်ည။ ငါ မသိဘူး ထင်နေလား။ ပြေးခုန်ပစ် ပွဲတုန်းက ပန်းစည်းလာပေးတဲ့ မြတ်သွယ် ကို နင် ကြိုက်တာနေတာ မဟုတ်လား။ တနေ့တနေ့ ခင်မောင်တိုးသီချင်းဘဲ ထပ် ထပ် ကျော့နေတာ ငါက နားကန်းနေလို့လား’
မဟာဆန်ချင်သူ နဲ့ မျက်သွယ် ကို သူ ခံစားချက်နဲ့ဆိုတာတော့ နားထောင်ကောင်းသားဘဲ။ သီချင်းအဖြစ်နဲ့ နားထောင်လို့ကောင်းပေမဲ့ မြတ်သွယ်ဆိုတဲ့ လှုပ်စိလှုပ်စိကို ရည်ရွယ်နေတာကိုတော့ စိမ့် မကြိုက်ဘူး။ ဥာဏ မြတ်သွယ်ကို သွား သွား ငေး နေတာကိုမြင်ရင် စိတ်တိုတယ်။ ဒါမျိုးကျတော့ ယောင်္ကျားပီသလိုက်လေ။
‘ စိမ့် အသံကျယ်ကြီးနဲ့ အော်မနေနဲ့။ သူများကြားသွားရင် တဘက်သား မိန်းကလေး အားနာစရာ။ ဘာမှလည်း မဟုတ်ဘဲနဲ့။’
ခါးတိုအကျီနဲ့အတိ ဆံပင်ရှည် ဖြန့်ချထားတဲ့ မြတ်သွယ်က ယဉ်သွယ်သွယ်နဲ့ ကြည့်ကောင်းတယ်။ အပြုံးကလဲ ချိုမြမြနဲ့ စကားပြော ညင်ညင်သာသာ သိမ်သိမ်မွေ့မွေ့ ရှိသူပါ။ စကားတခွန်းပြောတိုင်း ဆံပင်ကို တစ်ကြိမ် ခါ တယ်။ စိမ့်တို့ကျောင်းမှာတော့ မြတ်သွယ် စတား ဘဲ။ ကျောင်းမှာ ဆုဗန်း ကိုင်တာ ပန်းစည်းဆက်တာ သူ မပါ မပြီးချေ။ မြတ်သွယ်ပေးတဲ့ ပန်းစည်းလိုချင်လို့ ဥာဏ မီတာ ၁၀၀ ၀င်ပြေးတယ်။
‘ နင် ရမ်း မပြောနဲ့ မိစိမ့်။ ဆရာက ဝင်ပြေးပါဆိုလို့ ပါတာ။ နင် အာကျယ်ပါကျယ်နဲ့ လျှောက်မပြောနဲ့လို့ ငါ သတိပေးထားတယ်နော်’
ဥာဏကို မျက်ခုံးတွန့်ကြည့်မိတယ်။ သတိပေးသတဲ့။ မိုက်ရိုင်းလိုက်လေ။ သူကများ။
သူ့အကဲ ကြည့်ရတာ မဟန်တာနဲ့ သားလှရွှေသွေး မောင်ညညလေးတယောက် ပညာရေး စိတ်မဝင်စားဘဲ အပိုအလုပ်တွေလုပ်နေကြောင်း ခင်ခင်ကို ဂုံးချောစကား သွားပြောပစ်ခဲ့တယ်။
ဒီတကြိမ်လည်း စိမ့်ကြောင့် ဥာဏ ငို ရပြန်တယ်။
သူ့အမေက စိမ့်လောက် စာမတော်တဲ့ သူ့သားကို နဂိုကမှ အားမရတဲ့ကြား ဒီလိုကိစ္စ ဝင်လာတော့ အလိုမကျမှု ဆောင့် တက်တော့တယ်။
‘သားသား။ ညည။ ငယ်ထိပ်ချေးတောင် မစင်သေးဘူး ဟင်။ လူပျိုလုပ်ချင်တာ လာစမ်း…. လာစမ်း’
ခင်ခင်က မြတ်သွယ်တုိ့ အမျိုးကို နည်းနည်းမှ ကြိုက်တဲ့သူ မဟုတ်ဘူး။ မြတ်သွယ့် အမေက မုဆိုးမ။ နည်းနည်း နွမ်းပါးတယ်။ ရုပ်ရည် ချောမောတယ်။ သူ့အဖေက အရာရှိတယောက်ဘဲ။ သူတို့အဖေ ဆုံးသွားပြီး ပင်စင်လခလေးနဲ့ ရပ်တည်နေဖို့ မဖြစ်တော့ မြတ်သွယ့် အမေကြီးက အရောင်းအ၀ယ်လေး ဘာလေး လုပ်တယ်။ သူအများနဲ့ဆက်ဆံရတော့ မျက်နှာထား ချိုချိုထားရတယ်။ ဒါကို ခင်ခင်က မကြိုက်တာ။ ရုပ်ကလေး ဗန်းပြကာ အသက်မွေးတယ်လို့ ယူဆတယ်။
စိမ့် မြတ်သွယ်ကို မကြိုက်တာက တမျိုး။ မြတ်သွယ့် မျက်နှာကို ကြည့်လိုက်တိုင်း သူ စိတ်ရင်းအတိုင်း နေထိုင်တယ်လို့ မထင်တာ။ သူ လှုပ်စိလှုပ်စိ နေတာကအစ မဟာဆန်ချင်သူ ပုံပေါက်အောင် တမင် ကျင့်ယူထားတယ်လို့ သိနေတာ။ ဘယ်လိုသိသလဲ စိမ့် ရှင်း မပြတတ်ဘူး။ မြတ်သွယ် ပြောတဲ့စကားဟာ ပြောလိုက်တာနဲ့ ရည်ရွယ်ရာ ထပ်တူ မရှိဘူး ဆိုတာလည်း သိ သိ နေ တယ်။
ခင်ခင့် ကို ဥာဏ ကြောက်ရတယ် ဆိုတာလည်း စိမ့် သိတယ်။ စိမ့်က အပေါင်းအသင်းစုံနဲ့ လည်ပတ် နေတတ်ပေမဲ့ သူ ဘယ်အချိန်မှာ ရပ်ရမယ်။ ဘယ်အချိန်မှာ ကျောင်းစာကို အာရုံ စိုက်ရမယ်ဆိုတာ ခွဲခြားထားတယ်။ ဥာဏ ဂစ်တာတလက်နဲ့ တနေကုန် မေ့မျောကာ ကဗျာစပ်လိုက် စာဖွဲ့လိုက်နဲ့ ဖြစ်နေတာကိုလည်း မြင်တယ်။ ဥာဏကို အရှက်ခွဲလိုခြင်းတော့ မဟုတ်။ သို့ပေမယ့် စိမ့် ပြသနာ ရှာမိတယ်။
အမေနဲ့ အမတွေကြား ဥာဏ လှုပ်တောင် မလှုပ်နိုင်ဘူး။ သူ့အမတွေ နားရွက်ဆွဲလိမ်လိုက်ကြတာ ရဲတွတ်နေပြီး သူ့နားပေါက်လေးတောင် တော်တော်ကျယ်လာသလိုဘဲ။ နားပေါက်လေးတွေ နီရဲနေတာတွေ့လို့ စိမ့် သနား သလိုလိုတော့ အရှိသား။
ခင်ခင် အပြောအဆို မတတ်မှုကြောင့် ဥာဏတို့အိမ်က ဆူဆူညံညံ အဖြစ်အပျက်တွေက အိမ်မှာတင် မပြီးဘဲ မြတ်သွယ်တို့အမေ အထိ သတင်းရောက်တယ်။ မြတ်သွယ်ကလည်း သူနဲ့ ဘာမှ မစတင်ရဘဲ ဒီလို သတင်း ထွက်လာကို အရှက်ရသွားပုံဘဲ။ ဥာဏအပေါ် ဆက်ဆံရေး တင်းမာ သွားတယ်။
စိမ့်ကြောင့် ဥာဏ အတော်ခံလိုက်ရပေမဲ့ အပြစ်တင်စကား တခွန်းမှ လာမပြောဘူး။ တွေ့ရင် မျက်လုံးစိမ်းနဲ့ ကြည့်တယ်။ စာမေးပွဲကြီး ဖြေပြီးတဲ့အထိ စိမ့်ကိုလည်း စကား ဟ ဟ မပြောတော့ဘူး။
******
အထက်တန်းကျောင်းအောင်လို့ စိမ့်က မွေးရပ်မြေကို ခွာရတော့ ဥာဏ နယ်ကောလိပ်မှာ ကျန်ခဲ့တယ်။ သူ့ မဟာဆန်ချင်သူလေးနဲ့ တကျောင်းတည်းပေါ့။ စိမ့် မထွက်လာခင် ညနေမှာ အိမ်ကို လာတယ်။ ခင်ခင် ပို့ခိုင်းလိုက်တဲ့ ငါးခြောက်ကြော်တွေနဲ့ စိမ့်အတွက်ဆိုပြီး သူ ထပ်ကူးထားတဲ့ သီချင်းတွေ လာပေးသွားတယ်။
‘ညည။ ငါ တယောက်တည်း သွားရမှာ ပျင်းတောင်ပျင်းတယ်။ နင် ရန်ကုန်ကျောင်း ပြောင်းခဲ့ပါလား။ နင့်ယောက်ဖဆီ သန်းခေါင်စာရင်း ပြောင်းလိုက်ပေါ့။ ’
မသိသားဆိုးရွားစွာ စိမ့် ပြောတယ်။ ခါတိုင်းလိုဘဲ ဥာဏ သိမ်သိမ်မွေ့မွေ့ ပြုံးတယ်။ ဥာဏ စိမ့်ကို ပြုံးမပြတာ နှစ်ဝက် ရှိခဲ့ပြီ။ ဥာဏ သူ့ကို ကြာရှည် စိတ်မဆိုးဘူးဆိုတာ သိနေပေမဲ့ သူ့ အပြုံးကို ပြန်မြင်ရမှဘဲ စိတ်ချလက်ချ ယုံစားနိုင်တော့တယ်။
စိမ့်တယောက်တည်း ထွက်လာခဲ့ရတာ အစပိုင်း ဟာတာတာ ဖြစ်နေပေမဲ့ သက်တူရွယ်တူ စိတ်တူသဘောတူ အဖော်များနဲ့ တွေ့ဆုံပြီး အိမ်ကိုတောင် မပြန်ချင်ဖြစ်လောက်အောင် ကျောင်းပျော် ဖြစ်လာတယ်။
တက္ကသိုလ်ကျောင်းသူဘဝ အဆောင်ကျောင်းသူဘဝ ဟာ စိမ့်လိုလူနဲ့ အလွန် အံဝင်ဂွင်ကျ ရှိလှတယ်။ ကိုယ့်ဆင်ခြင်ဥာဏ်နဲ့ ကိုယ်ဘာသာ ကိုယ် ထိန်းကျောင်းရကာ အကန့်အသတ်မဲ့ လွတ်လပ်ခွင့် ကိုလည်း ရယူခံစားနိုင်တယ်။ အပျော် လွတ်လပ်မှုနဲ့ မိမိကိုယ်တိုင် တာဝန်ယူရမှု ကို ကောင်းစွာ သဘောပေါက်လာပြီး စိမ့် ဘဝ ကို စိမ့် ကောင်းစွာ စီမံလာနိုင်တယ်။
ဥာဏကို ခင်ခင့်လက်အောက်က လွတ်မြောက်ပြီး လူငယ် ပီပီ ဘဝ ကို ရစေချင်တယ်။ ဘဝဟာ ခင်ခင်နဲ့ မြတ်သွယ်တို့နဲ့တင် မပြီးဘဲ ကြည့်စရာ လေ့လာစရာ စူးစမ်းစရာ ခံစားစရာ ကျယ်ပြောတဲ့ လောက ကျန်ရှိသေးတယ်ဆိုတာ ပြောပြချင်တယ်။
မြို့ က သူငယ်ချင်းများကြောင့် ဥာဏတယောက် မြတ်သွယ်ကို တရစ်ဝဲဝဲ ရှိနေဆဲဆိုတာ ကြားရမြဲ။ ဥာဏ စိတ်ချမ်းသာရင် ပြီးတာပါဘဲလို့ စိမ့် တွေးလာနိုင်တယ်။ ကျောင်းပိတ်ရက် အိမ်ပြန်တော့ ဥာဏအတွက် သီချင်းစာအုပ်တွေနဲ့ သီချင်းခွေတွေ ဝယ်သွားပေးတယ်။ ဥာဏ စိတ်ကြည်လင်နေတာ မြင်ရတော့ သူ အမြဲ သိလိုတဲ့ အကြောင်းအရာကို မေးခွန်း ထုတ်မိတယ်။
‘ ညည။ နင် ဘာလို့ မြတ်သွယ်ကို ကြိုက်သလဲ။ တခြားမိန်းကလေးတွေနဲ့ သူ ဘာခြားနားလို့လဲ ပြောပြစမ်းပါ’
‘ ဟာ။ မိစိမ့်……… ဘာတွေ လာမေးနေတာလဲ’
‘ ငါ နားမလည်လို့ပါ ဟ။ ပြောပြစမ်းပါ’
ဥာဏ စိတ်ရှုပ်ဟန်နဲ့ အတန်ကြာ ငြိမ်သက်သွားတယ်။ သက်ပြင်းတချက် ချပြီးမှ……………
‘ နင့် ပြောလည်း နင်မှ နားမလည်တာ။ ………….. အဲ… ဒါ… ဟိုလိုမျိုး…..အတန်းထဲမှာ မိန်းကလေးအများကြီး ရှိတယ်။ ဒါပေမဲ့ သူ့ကိုဘဲ ငါ အရင် မြင်တယ်။ သူ့ ကို မြင်နေရရင် ငါ ရင်ခုန်ပြီး ပျော်နေတယ်။ သူ ပျော်အောင် စိတ်ချမ်းမြေ့အောင်လည်း လုပ်ပေးချင်တယ်။…….ငါ … ငါ..မပြောတတ်တော့ဘူး…..ဟေ့…တော်ပြီ တော်ပြီ’
ဥာဏ့ မျက်နှာ ရှက်သွေးနဲ့ ရဲလာတယ်။ စိမ့် အတော် ရယ်ချင်သွားတယ်။ ဒုက္ခ။ ဒီလို မအူမလည်ပုံနဲ့ မြတ်သွယ်ကို ဘယ်လို ချဉ်းကပ်မှာပါလိမ့်။ စိမ့်က ဘယ်လောက်ထိ လောကီရေးရာ နားမလည်နိုင်အုန်းတော့ မြတ်သွယ် ပညာရှင်အဆင့်ဆိုတာ မိန်းမချင်း သိတယ်။
‘ ဒီတော့ မြတ်သွယ်ကို နင် ဖွင့်ပြောပြီးပလား။ ဘာတဲ့လဲ။ နင့်ကို ပြန်ကြိုက်တာလား မကြိုက်တာလား’
‘ အင်း။ သူက ပြောတယ်။ လက်ဖက်ကောင်းစားချင်ရင် ပလောင်တောင်တက် နှေး ရမယ်တဲ့’
‘ဘာ …. ဘာကြီးရယ်’
‘သူ အချိန်ယူ စဉ်းစားဦးမယ်ဆိုတဲ့ သဘောပေါ့ဟာ ’
‘ အမ်… လက်ဖက်သုပ်ရောင်းတဲ့မိန်းမကိုး.. ဘာကြီးတုန်း’
ဥာဏ စိမ့်ကို စူးစူးစိုက်စိုက် ပြန် ကြည့်တယ်။ တခုခု ပြောချင်သလိုလို တွန့်ဆုတ်သလိုလို နဲ့ နှုတ်ခမ်း တပြင်ပြင်။ နောက်ဆုံး သူ မနေနိုင်တော့ဘူး။ စိမ့်ကို မေးတယ်။
‘ စိမ့် … မိစိမ့်’
‘ ပြော’
‘ မြတ်သွယ်ကို နင် မုန်းနေတာလား’
မြတ်သွယ်ကိုလား။ အဲဒီမိန်းမကိုလား။ စိမ့် ရယ်ပစ်လိုက်တော့ ဥာဏ နားမလည်သလို ကြည့်တယ်။
‘ငါလည်း နင်လိုဘဲ ပြန်ပြောရတော့မယ်။ နင့်ကိုပြောရင်လည်း နင် နားလည်မှာမဟုတ်ဘူး။ နေအုန်း ငါ အတက်နိုင်ဆုံး ရှင်းအောင် ပြောပြမယ်။ မုန်းတာတော့ မဟုတ်ဘူး။ ငါ့ စိတ်အာရုံမှာ အဲဒီတယောက် အဆင်မပြေဘူး။ နင်နဲ့ ပြေတယ်ဆိုရင် ငါက ဘာမှပြောစရာ မရှိဘူး။ ငါ ကြည့် မရပေမဲ့ နင်ကို သူ တကယ်ကြိုက်ရင် နင် စိတ်ချမ်းသာနေရင် နင့်အတွက်တော့ ၀မ်းသာပေးမယ်။ ခုလို လက်ဖက်သုပ် ရောင်းနေရင်တော့ ပိုတောင် ကြည့် မရသေးတယ်။ အဲ နင့်ကို ထိခိုက်အောင်လုပ်ရင်တော့ မုန်းချင် မုန်းမိမှာပေါ့။ ညည ငါ ဒီလိုပြောလို့ တောင်တွေးမြောက်တွေး မတွေးနဲ့။ နင်နဲ့ငါ နို့တလုံးတည်း စို့လာတဲ့လူတွေ။ နင့်ဘေးနားမှာ ရှိမယ့် လူက ငါ ကြည့်လို့ရတဲ့လူ ဖြစ်စေချင်တာတော့ အမှန်ဘဲ။ မဖြစ်တော့လည်း မကြည့် ရုံပေါ့။ ဟုတ်တယ်မဟုတ်လား။ နင် စိတ်ချမ်းသာရင်ပြီးတာဘဲ’
ဥာဏ ကြည်ကြည်လင်လင် ပြုံးတယ်။ စိမ့်ရဲ့ စိတ်ရင်းအမှန် ကို သူ သိတယ်။ ဘယ်လောက်ဘဲ ကန်ကျောက်ခဲ့စေ ကုန်းကိုက်ခဲ့စေ စိမ့်ကြောင့် ငိုခဲ့ရပစေ သူ တခါမှ စိမ့်ကို စိတ်မဆိုးခဲ့ဖူးဘူး။
လက်ဖက်သုပ်ဇာတ်မျောကြီးက စိမ့်တို့ ကျောင်းပြီးတောင် မပြီးတတ်သေးဘူး။ မြတ်သွယ်ကလည်း ဟိုတယောက်နဲ့ကြည်မလိုလို ဒီတယောက်ကိုဘဲ မျက်နှာသာပေးသလိုလိုတွေ ခဏ ခဏ ကြားရတယ်။ အစွဲအလန်းကြီးပြီး စိတ်နှလုံး သိမ်မွေ့တဲ့ ဥာဏကတော့ တောင်တက်ရမဲ့အရေး အမျှော်လင့်ကြီး မျှော်လင့်နေဆဲ။
ခင်ခင့်ကြောင့် မြတ်သွယ် တွေဝေတာလည်း ဖြစ်နိုင်တယ်။ ခင်ခင်က သူ့သားနဲ့ ပက်သက်ရင် အကဲဆတ်ဆတ်ရယ်။ မြတ်သွယ်ကို သူ မကြိုဆိုနိုင်ကြောင်း သိသိသာသာ သတင်းထုတ်ပြန်တယ်။ ဥာဏကို ပြတ်ပြတ်သားသား မပြောဘဲ ဒီအချိန်အထိ ဆွဲဆောင်ထားနိုင်တာတော့ အရည်အချင်း တရပ်ဘဲ။ စိမ့် မနှစ်မျို့  လိုက်တာ။
‘ ညည။ အဲဒီ လက်ဖက်သုပ်ကို လက်လျှော့ပြီး တခြား ကြိုက်စမ်းပါ ဟ။ ဒီတယောက်ကိုဘဲ မိန်းမ ထင်နေလား ဟာ။ နင့်မလဲ ။ နင့် ကြည့်ရင်းနဲ့ အဲဒီ မိန်းမကို ငါ အမုန်းကြီး မုန်းမိတော့မယ်။ အဲဒီလိုမိန်းမကို အာရုံထဲတောင် ထားချင်တာ မဟုတ်ဘဲ နင့်ကြောင့် ထား ထား နေရတာ မကြိုက်လိုက်လေ။’
အောင့်အီးမနေနိုင်လို့သာ ပြောရ ဥာဏအကြောင်းသိနေတော့ ပြော စကား အဖတ်တင်ရုံဘဲ ဆိုတာ စိမ့် သိပါတယ်။ အစွဲအလန်းကြီးတဲ့ ကောင်ကလေး မလွယ်ပါဘူး။
ကျောင်းပြီးတော့ ဥာဏ သဘောင်္တက်ဖို့ကိစ္စနဲ့ ရန်ကုန်ကို ရောက်လာတယ်။ သူ့အမ အိမ်မှာ နေတယ်။ စိမ့်က အဆောင်မှာ။ ဥာဏလိုလူက ပင်လယ်ထဲ ဆင်းဘို့ ဘယ်တွေးမလဲ။ ခင်ခင့် အမိန့်နဲ့ ရောက်လာတာ။ ခင်ခင်က သူ့သားကို မြတ်သွယ်နဲ့ ဝေးဝေး ရှိနေစေချင်တဲ့သဘောလည်း ရှိသလို အဲဒီခေတ်အခါအရ ရေပန်း အစားဆုံး အလုပ်ကို လုပ်စေချင်တာလည်း ပါမှာပေါ့။ မဟုတ်လို့ကတော့ သူ့သား ရွှေသွေးလေးကို သူ့ မျက်စိအောက်မှာဘဲ ထားချင်တဲ့ အမေ ဘဲ။
သင်တန်းပေါင်းစုံ ဒေါက်ဆင်းဘို့ကိစ္စနဲ့ သူ ရှုပ်နေချိန် စိမ့်ကလည်း အလုပ်ကိစ္စတွေ ရှေ့ ဆက်ရမယ့် ဘဝလမ်းအတွက် ညနေပိုင်း သင်တန်းပေါင်းစုံနဲ့ ပြေးလွှားနေရတယ်။ သူ အဆောင်ကို လာချိန်ဆိုလည်း စိမ့်က ဘယ်တော့မှ မရှိတတ်။ မြို့ကြီး ရောက်လာလို့လား ခင်ခင့်အရိပ်က လွတ်လာလို့လား တကယ့်ဘဝထဲ ဝင်လာရလိုိ့လား အားလုံးကြောင့်လား သေချာမပြောနိုင်ပေမယ့် ဥာဏ အရင်က ထက် ပိုသွက်လာတယ်။
လူငယ်များစွာ ဘဝအတွက် ရှေ့ရေးအတွက် တက်လမ်းအတွက် မိသားစုအတွက် ကိုယ်ပိုင်ဘဝ အတွက် လှုပ်ရှား ပြေးလွှား နေကြတယ်။ တွေဝေ ငေးငိုင်နေရန် အချိန် မရှိကြ။ စိမ့် မနက် ၅ နာရီ ထရတယ်။ မနက် ၆ နာရီက ၈ နာရီကို အင်္ဂလိပ်စာ သင်တန်းတက်တယ်။ ၉ နာရီအမီ ရုံး ပြေးရတယ်။ ညနေ ၆ နာရီ ကွန်ပြူတာသင်တန်း တက်တယ်။ ၈ နာရီကျော် အဆောင် ပြန်ရောက်ချိန် ထမင်းဖြူနဲ့ လက်ဖက်သုပ်နဲ့ ညစာ ပြီးလိုက်ရတဲ့ ရက်တွေ များတယ်။ ရံဖန်ရံခါ ကြာဇံချက်နဲ့တင် ညစာ ပြီးသွားရတယ်။ ပင်ပန်းဆင်းရဲပေမယ့် စိမ့် တခါမှ ဝမ်းနည်းစိတ်ပျက်ခြင်းမရှိ တက်တက်ကြွကြွ အလုပ်လုပ်နိုင် ပညာသင်နိုင်ခဲ့တယ်။
ဥာဏလည်း ဒေါက်ဆင်းတဲ့ကိစ္စ ဖိုးတစ်ကက်ဆိုတဲ့ လက်မှတ်ရဖို့ကိစ္စနဲ့ ဗျာများနေတယ်။ တသက်လုံး မြင်တွေ့လာရတာ အဲဒီအခိုက်အတန့် ကလေး ဥာဏကို မြင်ရတာ အကြံ့ခိုင်ဆုံးဘဲ။
သုံးလေးလလောက်အကြာမှာ မြတ်သွယ် စစ်ဗိုလ်လေးတယောက်နဲ့ စေ့စပ်တော့မယ် သတင်းကြားလို့ ဥာဏ ရုတ်တရက် အိမ်ပြန်ချသွားတယ်။ ဘာတွေ ဆက် ဖြစ်ကြလဲ မသိဘူး။ ဥာဏ ရန်ကုန် ပြန် မလာတော့ဘူး။
အလုပ်ဝင်ခါစမို့ စိမ့်လည်း အိမ်မပြန်နိုင်ဘူး။ သင်္ကြန်ပိတ်ရက်မှ အိမ်ပြန်ရောက်တယ်။ ရောက်ရောက်ချင်း ခင်ခင်တို့အိမ်ကို ကူးသွားတော့ ဥာဏ အိမ်မှာ မရှိဘူး။
‘ညည ခြံထဲမှာနေတယ် သမီး။ အိမ်မှာ ပြန် မနေဘူး။ သူ စိုက်ပျိုးမွေးမြူရေးပဲ လုပ်တော့မယ်တဲ့။ ကြုံတုန်း နည်းနည်း ပြောသွားပါအုန်း စိမ့်ရယ်။ ညည အခု တော်တော် ဆိုးနေတယ်။’
ခင်ခင်ပြောမှ ဥာဏ တယောက် တသက်လုံး မလုပ်ခဲ့ဖူးတဲ့ အရာတွေ လျှောက်လုပ်နေတာ သိရတော့တယ်။ အရက်သောက်သတဲ့။ ဆေး ချ သတဲ့။ ဖဲရိုက် သတဲ့။ ဂျင်ဝိုင်း သွားသတဲ့။
ဘုရား….. ဘုရား။ စိမ့် ဘုရား တ ယူရတယ်။
‘ခင်ခင်။ ဘာတွေဖြစ်ကုန်တာလဲ။ ဟိုတယောက် မြတ်သွယ်ကကော ယောင်္ကျားယူသွားပြီလား။’
‘ကောင်မလေး စေ့စပ်ပွဲ မလုပ်ဖြစ်ဘူး စိမ့်။ သားသားကိုလည်း အမျိုးမျိုး လှည့်စားနေတာ။ သူ့ မျိုးရိုး မကြိုက်ပေမဲ့ သားသားကို တကယ် မေတ္တာရှိရင် ခင်ခင် တောင်းရမ်းပေးပါတယ်ကွယ်။ ခု ဟာက တမင်သက်သက် သားသားကို ကြိုးရှည်ရှည်နဲ့ လှန်ထားတာ’
သူ့သား နွားလိုကောင်က အလှန်ခံ နေတာကိုး။
ခြံထဲလိုက်သွားတော့ ဥာဏနဲ့တွေ့တယ်။
‘ညည။ နင် ဘာတွေ လျှောက်လုပ်နေတာလဲ။ ကြားရတာ ယုံတောင် မယုံနိုင်ဘူး။’
‘နင် ဘာကြားလာလို့လဲ။ ငါ အခု သူများတွေလို နေတာဘဲ။ နင်ဘဲ အရင်က ယောင်္ကျားပီပီ နေစမ်းပါဆို။ ငါ ဘာမှ ထူးထွေ နေတာ မဟုတ်ဘူး။’
‘ညည။ မကပ်နဲ့။ နင် အချိန်အခါ လွဲ နေပြီ။ ဒါမျိုးတွေ ဆယ်ကျော်သက်အရွယ်မှာ စမ်းလုပ်မိရင် နင့် အမှား မဟုတ်ဘူး။ ငါတောင် စမ်းလိုက်သေးတယ်။ အဲဒီတုန်းက ငါ ကလေကချေတွေနဲ့ ပေါင်းတယ်လို့ နင်တောင် ပြောခဲ့သေးတယ်။ ခု အချိန်က အဲဒါတွေ သွား စမ်းရမယ့် အချိန် မဟုတ်တော့ဘူး။ နင် ဆက်သွားရမဲ့ ဘဝအတွက် ပြင်ဆင် အားထုတ်ရမယ့် အချိန်။ ဘာလဲ နင့် လက်ဖက်သုပ်ကြောင့် ဖြစ်နေတာလား။ ဒီလောက်ဖြစ်ရတာ သွား ဆွဲကွာ။ ခင်ခင် သဘောမတူလည်း ဘာအရေးလဲ။ နင် ကြိုက်ဖို့သာ အရေးကြီးတယ်’
‘ မြတ်သွယ်နဲ့ ဘာမှ မဆိုင်ဘူး’
‘ဒါဆို ဘာနဲ့ဆိုင်လဲ။ ဘာနဲ့ဆိုင်လဲ။ ဟဲ့……. ငါ မေးနေတယ်။ သဘောင်္တက်ဘို့ သင်တန်းတွေ လွှင့်ပစ်ခဲ့ပြီး ဒီမှာ လာနေတာ ဘာနဲ့ဆိုင်လဲလို့…… ’
စိမ့်က ဒေါသစိတ်နဲ့ မီးဝင်းဝင်းတောက်နေချိန် ဥာဏ က အရင်လို သိမ်မွေ့တဲ့ အပြုံးနဲ့သာ စိမ့်ကို ကြည့်တယ်။ အဲဒီအပြုံးကို စိမ့် ဒေါသထွက်လိုက်တာ။ ငယ်ငယ်ကလို ကန်ကျောက်ခဲ့ရမလား။ ကုန်း ကိုက်လိုက်ရမလား။ တွေးရုံသာတွေးပြီး ဘာမှမလုပ်ခဲ့ရဘဲ စိတ်ပျက်လက်ပျက်နဲ့သာ ပြန်ခဲ့ရတယ်။
ခင်ခင် နဲ့ ဘဘညွှန့်လဲ ဥာဏကို မကိုင်တွယ်နိုင်။ ပေကပ်ပြီး ခြံထဲမှာဘဲ နေတော့တယ်။ စိမ့် ပြန်ခါနီး နှုတ်ဆက်ဘို့ ခြံထဲလိုက်သွားတော့ မရှိဘူး။ လောင်ကစားဝိုင်း ထွက်သွားတဲ့ သတင်းရတယ်။
ဥာဏ သူ တသက်လုံးမျှော်လင့်လာရတဲ့ မြတ်သွယ်အချစ်ကို မရလို့လား။ ခင်ခင်ကို အရွဲ့တိုက်သလား။ ဘာကြောင့် ခုလို ဖြစ်သွားရလဲ ဘာကြောင့် သူ့စိတ်ကို ဒီလို လွတ်ပစ်ရလဲ အကြောင်းရင်းကိုလည်း စူးစမ်းလို့မရ။
နောက်ဆုံး စိမ့်ရဲ့ ကောက်ချက်ကတော့ ဥာဏ စိတ်ဓာတ်မကြံ့ခိုင်လို့ဖြစ်တာ။ သူတပါးကြောင့် ကိုယ့်ဘ၀ တခုလုံး ရေစုန်မျောစေတာ အဓိပ္ပါယ်မဲ့ လုပ်ရပ်ဘဲ။ စိတ်ပျက်စရာကောင်းတဲ့ လူ။ ကိုယ့် ဘာသာ ဝေဖန်ဆင်ခြင်ခြင်း လုံးလုံး မရှိတဲ့ လူပါလား။ စိမ့် ဘာမှ မပြောလိုတော့ပြီ။ စိမ့်က ပျောညံ့တဲ့လူကို အထင်သေးတယ်။ စိမ့်ဘဝမှာ ဥာဏထက် အရေးကြီးတဲ့ကိစ္စတွေ အများကြီး။ စိမ့် ရုန်းကန်ရှင်သန်ရမယ့် ကမ္ဘာကိုသာ ပြန်ခဲ့တယ်။
******
အဲဒီနေ့က မိုး သည်းသည်းမည်းမည်း ရွာတယ်။ မနက်ဖြန်မနက် အစောကြီး ခရီးဝေးထွက်ရမယ့် စိမ့်က တနေကုန် ပြေးလွှား အလုပ်များရမှာမို့ အစောကြီး ထ ရတဲ့ နေ့လည်းဖြစ်တယ်။ သူ့ ဖုန်း မြည်လာလို့ ကိုင်ချိန်မှာ ဥာဏ့ အသံ။ အံ့ စရာဘဲ။ သူ့အသံ မကြားရတာ အတော်ကြာနေပြီ။ ဥာဏနဲ့ မတွေ့ရတာ တနှစ် ပြည့်တော့မယ်။
‘စိမ့် ငါ အခု ဘူတာကြီးက ဆက်နေတာ။ ခု ရထားဆိုက်တာ။ နင် နဲ့ တွေ့ချင်လို့’
‘ဟင်….. ညည။ နင် ဘယ်အချိန်ရောက်မှာလဲ။ ငါ အခု ထွက်ရတော့မှာ။’
‘ ဒါဆို ညနေ လာခဲ့မယ်’
‘ဒီ ညနေလား။ ဟဲ့ ငါ ဒီနေ့ည ရုံးကလူတွေနဲ့ နှုတ်ဆက်ပွဲ ဒင်နာရှိတယ်။ ငါ့အတွက် လုပ်ပေးတာ။ နောက်ကျမှာ’
‘ ဒါဖြင့် မနက်ဖြန် လာခဲ့မယ်။ ဒီနေ့ ငါ ယောက်ဖအိမ်ကို ခဏ သွားနေလိုက်မယ်’
‘ညည။ ငါ မနက်ဖြန်မနက် ခရီးထွက်ရမှာ။ ဘာအရေးကြီးလို့လဲ။ ဘာဖြစ်လို့လဲ။ ရန်ကုန်မှာ ကြာအုန်းမလား။ ငါ ပြန်လာမှ တွေ့မယ်လေ။’
‘နင် ဘယ်လောက်ကြာမှာလဲ’
‘တလဘဲ ။ ငါ သင်တန်း သွားတတ်တာ။ ရုံးကလွတ်လို့ သွားရမှာ။ အဲ ….နင်နဲ့တွေ့ချင်တာ နော်။ ပြန်လာမှ တွေ့ရအောင် ညည။ ခင်ခင်ကော နေကောင်းလား’
‘အင်း’
ဥာဏ အသံက လေးတွဲ့တွဲ့နဲ့။ စိမ့် အလုပ်များတဲ့ရက်မှ ခရီးထွက်ခါနီးမှ တိုက်ဆိုင်စွာ ရောက်လာတာ ဘယ်လို ကံအကြောင်းပါလိမ့်။
ညနေ ရုံးအဖွဲ့တွေနဲ့ စားသောက်နေတုန်း ဥာဏဆီက ဖုန်း တခါ ထပ်ဝင်လာတယ်။ ထမင်းစားပွဲ မပြီးသေးဘူးလား မေးတာတဲ့။ စိမ့် ဘာပြောရမှန်း မသိဘူး။ ထ ပြန်ပြီး ဥာဏရှိရာကိုဘဲ သွားလိုက်ရမလား။ သူ့ဆီ သွားပြန်လည်း မနက် သွားဘို့ အထုပ်အပိုးကိစ္စတွေ မပြီးတတ်သေး။ စိတ်ထဲတော့ နည်းနည်း ထင့် မိတယ်။ ဥာဏ ဘာဖြစ်လို့ပါလိမ့်။
မတင်မကျနဲ့ဘဲ ခရီးက ထွက်လာရတယ်။
သင်တန်းကာလ တလျှောက် နည်းပညာအသစ် စီမံခန့်ခွဲမှုအသစ်တွေကို မနည်းမီအောင် လိုက် နေရတော့ ဥာဏအကြောင်း ပြန် မစဉ်းစားဖြစ်ဘူး။ ဥာဏ သူ့ဆီ ဖုန်းဆက်တဲ့ကိစ္စကိုလည်း ဘယ်သူ့ကိုမှ မပြောမိလိုက်ဘူး။
စိမ့် သင်တန်းကပြန်လာလို့ အိမ်ကို ဆက်သွယ်တော့မှ ဥာဏ ပျောက်နေတာကို သိရတော့တယ်။ မြတ်သွယ် အင်ဂျင်နီယာလေး တယောက်နဲ့ လက်ထပ်သွားသတဲ့။ မြတ်သွယ် လက်မထပ်ခင် တရက်အလိုမှာ ဥာဏ အိမ်က ထွက်သွားတယ်။ ပျောက်နေတာ တစ်လကျော်ပြီ။ သတင်းစာမှာ ကြော်ငြာထည့်တယ်။ အကြောင်း မထူးဘူး။
ဒီတော့မှ စိမ့်မှာ ထူပူ သွားပြီး မေးရမြန်းရ စုံစမ်းရတော့တယ်။ ရန်ကုန်က ယောက်ဖ အိမ်ကိုလည်း ရောက်မလာဘူး။ စိမ့်ကို ဖုန်းဆက်တာ နောက်ဆုံး အဆက်အသွယ်ဘဲ။
ဥာဏ …..စိတ်ပျော့ ညံတဲ့ ကောင်လေး။ ဘယ်ကို ရောက်နေပါလိမ့်။ ပူပင်စိတ်နဲ့အတူ ဒေါသစိတ်လည်း ဝင်တယ်။ သူများကို စိတ်ဒုက္ခပေးတဲ့ သူဘဲ။ ငယ်ငယ်က သူများကို နည်းနည်းမှ ဒုက္ခ မပေးတတ်သူက ဒီလို ပြောင်းလဲသွားတာ အံ့သြရတာနဲ့အမျှ ပျော့ညံ့လေခြင်းလို့လည်း အပြစ်တင်မိတယ်။
နောက် နှစ်ပတ်အကြာ ဥာဏအဖေ ဘဘညွှန့် နဲ့ စိမ့် ဖေဖေ တို့ နှစ်ယောက် စိမ့် ဆီ ရောက်လာတယ်။ ဥာဏ့ သတင်းရလို့တဲ့။ မီးရထားလမ်းဘေးက မြို့ ငယ်လေး တမြို့ဆီ ကို ဘဘနဲ့အတူ ချက်ချင်း ထ လိုက်သွားရတယ်။ ဘဘညွှန့်က သတင်းရတယ်လို့သာ ပြောပေမဲ့ စိမ့်ကို အပါ ခေါ်လာကတည်းက သိနှင့် နေပါပြီ။
ရဲစခန်းကို အရင်သွားရတယ်။ စခန်းမှုး ထုတ်ပြတဲ့ ဓာတ်ပုံကို မြင်လိုက်ရချိန် စိမ့် ကမ္ဘာ ဟာ မှောင် မိုက် သွားခဲ့တယ်။ အရောင်တွေ အားလုံး ရောထွေးသွားပြီး ဘာကိုမှလည်း မမြင်ရတော့ဘူး။ ဆို့နစ်ပြီး အသက်ရှုမရ ဖြစ်သွားခဲ့တယ်။
ဥာဏလို့ ထင်ရတဲ့ လူ တယောက်ရဲ့ ရထားလမ်းပေါ်က အပိုင်းအစများ။ တကယ်ကို အစိတ်စိတ် အမြွာမြွာပါလား ညညရယ်။ ဖြစ်ရလေ…….. ဖြစ်ရလေခြင်း။
ပုံရက်သား လဲ ကျ သွားတဲ့ ဘဘညွှန့်ကို ပြုစုရ၊ ဥာဏဖြစ်ကြောင်း အတည်ပြုဖို့ကိစ္စတွေ လုပ်ရ၊ အလောင်း ပြန်သယ်ဖို့ မဖြစ်နိုင်တဲ့အတွက် ခင်ခင်တို့ကို အကြောင်းကြားရ၊ သူတို့လာရင် တည်းခိုဖို့ စီစဉ်ရ၊ ရင်ကွဲပက်လက် ဖြစ်နေကြတဲ့ ခင်ခင်နဲ့ အမတွေကို ဂရုစိုက်ရနဲ့၊ တစိမ်းမြို့ရွာမှာ စိမ့်နဲ့ ဖေဖေ ဖတ်ဖတ် သီ ပင်ပန်းရတယ်။
သုံးရက်လုံးလုံး စိမ့် မအိပ်နိုင်ဘူး။ ည ဆို မျက်လုံး အကြောင်သားနဲ့ ငယ်ဘဝ ပုံရိပ်တွေကိုသာ အထပ်ထပ် မြင်ယောင်မိတယ်။ ဥာဏ ပထမဆုံး စိမ့်ကို မျက်လုံးစိမ်းနဲ့ ကြည့်တာ လက်ဖက်သုပ်မ ကိစ္စဘဲ။ သူ့လက်ကိုင်ပုဝါတွေ စိမ့်ကြောင့် ပစ်လိုက်ရတာ အများကြီး။ သူ ကူးပေးထားတဲ့ သီချင်းစာအုပ်တွေ အိမ်မှာရှိနေသေးတယ်။ သူ ဖုန်သုတ်ပေးတဲ့ စက်ဘီးလေးလည်း ဟောင်းသွားပေမဲ့ အိမ်မှာ ရှိနေဆဲ မဟုတ်လား။
ရင်ထုမနာ ဖြစ်လိုက်တာ။ စိမ့် အခုမှ ရင်ထုမနာ ဆိုတဲ့စကားကို ကောင်းစွာသိတော့တယ်။ ရင်ဘတ်တခုလုံး ထုံကျင်အောင့်ကာ နာကျင်နေလိုက်တာ လက်နဲ့ထုတဲ့ အနာလောက်ကတော့ အနာလို့ မထင်ရတော့လောက်အောင် နာကျင်ရတယ်။
တချိန်တည်းမှာပဲ ဥာဏကို ဒေါသဖြစ်တဲ့စိတ်ကလည်း အတောမသတ်။ ဘာကြောင့် ဖုန်းဆက်တဲ့အချိန် တွေ့ကိုတွေ့ရမှဖြစ်မယ်လို့ မပြောသလဲ။ ညစာထမင်းစားပွဲမက သင်တန်း ဆိုတာတွေလည်း အကုန် ဖျက် လိုက်လို့ရတယ်။ ဘယ်လိုစိတ်နဲ့ စိမ့်ကို ဖုန်းဆက်ခဲ့တာလဲ။ ဘယ်လိုစိတ်နဲ့ ခြေဦးတည့်ရာ ထွက်သွားခဲ့တာလဲ။ ဘယ်လိုစိတ်နဲ့ ရထားလမ်းပေါ် လှဲ ချရသလဲ။ တမင်လား။ မတော်တဆလား။ အရက်မူးနေသလား။ ဆေး ထ နေသလား။ အသုံးမကျလိုက်လေ ဥာဏရယ်။
‘ ကောင်လေး ငယ်ကတည်းက တော်တော် သိမ်မွေ့တဲ့ကလေး။ ခုလိုဖြစ်သွားတာ ရင်နာစရာဘဲ။ သမီး မသိလို့။ ခု နောက်ပိုင်း ဥာဏ လောင်းကစားလုပ်လို့ မခင်ရဲ့  ပစ္စည်းတွေ ကုန်ပြီ။ ဆေး ထ လာရင် အိမ်မှာ လာ လာ သောင်းကျန်းတာ မုန်တိုင်းဝင်နေသလိုဘဲ။ ကောင်လေး စိတ်အခံ အားနည်းတယ်။ မခင် ကြောင့်လည်းပါတယ်။ မောင်ညွှန့်ကလဲ စိတ် ခပ်ငယ်ငယ်။ သားသမီးကို သွန်သင်တာ အမြင်ကျဉ်းတယ်။ သမီးတို့ ငယ်ငယ်က ဖေဖေ တော်ရုံကို မတားမြစ် မကွပ်ညှပ်တာ ဒါကြောင့်ဘဲ။ သမီးတို့ကို လွတ်ထားပေမဲ့ စောင့်ကြည့်နေတယ်။ အလွန်အကျွံဆို ဖေဖေ ဘယ်ကြည့်နေမလဲ။ ငယ်ငယ်က အမှားနည်းနည်း ကြုံခဲ့ရင် ကြီးရင့်ချိန် အမှားများများကို ရှောင်ကျဉ်နိုင်တယ်။ ကောင်လေး စိတ်ပျော့တယ်။ တင်းခံ မထားနိုင်ဘူး။ သူ ကြိုက်တဲ့ ကောင်မလေး လက်ထပ်သွားတာကိုလည်း အတော် ထိခိုက်သွားပုံရတယ်။ မခင် အပြောအဆို မတတ်တာတွေလည်း ပါတယ်’
ခင်ခင်ကြောင့် မြတ်သွယ်ကြောင့် ဥာဏ ဒီလိုဖြစ်ရတာဆိုတာ စိမ့် လက်မခံဘူး။ လူတယောက်ဟာ သူ အပြုအမူအတွက် သူ သာလျှင် တာဝန်ရှိတယ်။ တပါးသူကြောင့်လို့ အပြစ်ပုံချစရာ အကြောင်းကို မရှိတာ။
စိမ့် တပတ်လုံးလုံး အစား ကောင်းကောင်း မစားနိုင်ဘူး။ အပိုင်းပိုင်း အစစ ဖြစ်နေတဲ့ ဓာတ်ပုံကို မြင်ယောင်နေမိပြီး အစာ စားတိုင်း အန် ထွက်တယ်။ ဖေဖေ စိတ်ပူပင်ရမှာ စိုးလို့ ကြိုးစား အားတင်းပြီး စားသောက်ရတယ်။
စိမ့် ဝမ်းနည်ပေမဲ့ မျက်ရည် မကျဘူး။ ဥာဏအတွက် စိမ့် မငိုကြွေးဘူး။ ဘယ်ကြောင့် သူ့အတွက် ပူဆွေး ငိုကြွေးရမှာလဲ။ စိမ့်က ပျော့ညံ့ နုံဖျင်းသူတွေကို မကြိုက်သူ ဖြစ်တယ်။ ရူးနှမ်း မိုက်မဲသူတဦး အတွက် စိမ့် မပူဆွေးနိုင်ဘူး။
သို့ပေမယ့် မိုးသံနဲ့ ရထားသံ ကြားရချိန်မှာတော့ စိမ့် တင်း ခံ မထားနိုင်ဘူး။ နှုတ်ခမ်းကိုသာ နာနာ ကိုက်ရတယ်။ နှစ်များစွာ ကြာမြင့်လာတောင် အဲဒီ အသံကြားရင် ရင်ထဲ လေးလံထိုင်းမှိုင်းကာ ကျင် လာတတ်တယ်။
ဥာဏ့ အသုဘကိစ္စ ပြီးစီးလို့ ပြန်လာတဲ့နေ့မှာလည်း မိုး သည်းသည်းမည်းမည်း ရွာတယ်။ စိမ့် တကိုယ်လုံး တုန်ခိုက်နေအောင် အေးစိမ့် စေတဲ့ မိုး။ တဘဝလုံး စွတ်စိုတဲ့ မိုး။ တသက်လုံး စိုရွဲ မယ့် မိုး။ ဘယ်လိုအရာကမှ နွေးထွေးအောင် မလုပ်နိုင်တော့တဲ့ မိုး။
အေးလိုက်တာ ဥာဏရယ်။ စိမ့် တော့ အအေးမိ နှာရည်ကျမှာ သေချာပါပြီ။
******
စိမ့် ဘဝ ဟာ ပုံမှန်အတိုင်း ဆက်သွားနေတယ်။ စိမ့် ဘဝ ရဲ့ အကောင်းဆုံးအချိန်တွေ။ အားရက်မရှိ နားရက်မရှိ အလုပ်လုပ်တယ်။ ပညာ ဆက်သင်တယ်။ ငယ်ကတည်းက မျှော်မှန်းခဲ့သလို မြို့ငယ်လေးကနေ ကမ္ဘာကြီးထဲကို ပျံသန်း တိုးဝင်နိုင်ခဲ့တယ်။ စိမ့်ရဲ့  ကောင်းကင် ကျယ်ပြောခဲ့တယ်။ စိမ့် နေထိုင်ရယူချင်တဲ့ဘဝ အောင်မြင်တယ်လို့ စိမ့် ထင်မြင်ယူဆထားတဲ့ ဘဝ ကို စိမ့် ပိုင်ဆိုင်ခဲ့တယ်။
ဒါပေမယ့် စိမ့် နည်းနည်းလေးမှ မပျော်ရွှင်နိုင်ပါကလား။
ကိုယ့်ခန္ဓာ အစိတ်အပိုင်းတခုလို ဥပမာ လက်တွေ ခြေတွေလို ကိုယ်နဲ့တွဲရက် ရှိနေချိန်မှာ အမှတ်တမဲ့ ဖြစ်နေပေမယ့် ပျက်စီးဆုံးရှုံးချိန်မှာတော့ ဘဝ တခုလုံး ကသိကအောက် မပြည့်မစုံ ဖြစ်သွားသလိုမျိုးပါဘဲ။ စိမ့် ဘဝ မှာ တခုခု ပဲ့ သွားတယ်။ ငယ်ဘဝ ကုန်ဆုံးချိန်လည်း မတူညီ ကြီးပြင်းလာချိန်မှာလည်း အတူတကွ မရှိတာများတဲ့ ဥာဏ……. သူတယောက် လူလောကမှာ မရှိတော့တာနဲ့ စိမ့် ဘဝ ဒီလောက် ဟာလာဟင်းလင်း ဖြစ်ရမယ်လို့ တခါမှ မတွေးမိခဲ့ဘူး။ စိတ်အနားလေး ရလိုက်တာနဲ့ ဘဝ ဟာ ခြောက်သွေ့ လိုက်တာလို့ မတွေးမိတဲ့ ရက် မရှိဘူး။
စိမ့်ကို နှစ်လိုချစ်ကြိုက်လာသူများကိုလည်း တွေ့ဆုံကြုံလာပါရဲ့ ။ သူ့ စိတ်နှလုံးကို ပုံအပ်လိုက်ရမယ့် လူ တယောက်မှ မဟုတ်ကြဘူး။ စိမ့် ဟာ မချစ်တတ်သူ မေတ္တာတရားကို မယုံကြည်သူလို့ အပေါ်ယံအသိနဲ့ လူတွေ ဆုံးဖြတ်ကြတယ်။ စိမ့် ပြန်လှန် ပြောဆိုချေပခြင်း မပြုဘူး။ အမှန်တကယ်လည်း ချစ်ခြင်းမေတ္တာဆိုတာ ယုံကြည်ကိုးစားနိုင်လောက်တဲ့ ကျက်သရေမင်္ဂလာ အတိဖြစ်တဲ့ အကြောင်းအရာလည်း မဟုတ်ဘူး မဟုတ်လား။ အမှန်ကို မမြင်နိုင်လောက်အောင် တွေဝေ မိုက်မဲစေတဲ့ အမိုက်တိုက် ဖုံးလွမ်းစေတဲ့ အခြင်းအရာ တခုဘဲ မဟုတ်လား။
စိမ့် ဒီလိုပဲ ယုံကြည် နားလည်ထားလိုက်တယ်။
သည်းတဲ့မည်းတဲ့ မိုးရေစက်များကို စိမ့် ကျော်ဖြတ်ရဦးမယ်။ ကျော်ဖြတ်နိုင်မယ့် စိတ်အင်အားလည်း ရှိပါတယ်။ စိတ်အင်အားကို တည်ဆောက်မွေးမြူတဲ့အလုပ် စိမ့် လုပ်နိုင်မှာလည်း သေချာပါတယ်။ ထိုအတူ မိုးရေစက်တွေက စိမ့်ကို မအေးမြနိုင်တော့တာလည်း အဖြစ်မှန်ပါဘဲ။
xxxxxx
စိမ့် သူ ဆက်သွားရမယ့် တောင်ကုန်းဆီကို လှမ်းမျှော်ကြည့်မိတယ်။ မြင်ကွင်းတခုလုံး တိတ်ဆိတ်ငြိမ်သက်လျက် ရှိမြဲ။ လောကကြီးတခုလုံး စိမ့် တယောက်တည်းသာ ရှိတယ်။ လေတိုက်လာပြီး မိုးနှင်းမြူတွေ သူ့ကို ဖွဲပက် လိုက်တယ်။ ခါတိုင်းလိုပဲ ဒီမိုးရေစက်များ သူ့ကို မစွတ်စို မအေးမြစေဘူး။ သွေးကြောများ စပ်ဖျင်းဖျင်း ပူနွေးလာပြီး တကိုယ်လုံး တုန်လာတယ်။ စိတ်ထဲ ဆို့နင့်လာတယ်။ မျက်လုံးဆီကို ဘယ်က အရည်ကြည်တွေ ပို့လွတ်လိုက်သလဲ။ ငိုချင်လာတာလား။
မဟုတ်တာ။
ဥာဏ အတွက် သူ ဘယ်နှစ်ကြိမ် ငို ခဲ့ဖူးသလဲ။
တခါမှ ………….
သူ တခါလေးမှ မငိုကြွေးခဲ့ဖူးဘူး။
No comments:
Post a Comment